Tá cuntas iarbháis in Donegal Democrat 4 Iúil 1991, cuntas gairid in Donegal Annual, 1991, agus tá cuntas ar an tréimhse a chaith sé ag bailiú béaloidis do Choimisiún Béaloideasa Éireann ag Séamas Ó Catháin in Béaloideas 60-1, 1992-3. I Móinín na hEasrach, i gceantar Ghleann Fhinne, Co. Dhún na nGall, a rugadh é 9 Lúnasa 1913 do William McMenamin, feirmeoir, agus Catherine Diver (taifead beireatais). Cuireadh bunscolaíocht air i scoil náisiúnta sa Bhrocaigh. IgColáiste Adhamhnáin, Leitir Ceanainn, bhuaigh sé scoláireacht go dtí an Coláiste Ollscoile, Baile Átha Cliath. An léann Ceilteach a bhí ar siúl aige agus bhuaigh sé scoláireacht Theach an Ardmhéara. Cháiligh sé mar bhunoide i gColáiste Phádraig, Droim Conrach. Ba dhuine dá léachtóirí ollscoile, Séamus Ó Duilearga, a mhol dó i 1933 béaloideas a bhailiú ina cheantar féin. Anuas go dtí Bealtaine 1934 rinne sé rud air. Nuair a bunaíodh Coimisiún Béaloideasa Éireann i 1935 d’fhéach Ó Duilearga chuige gur fostaíodh Liam mar bhailitheoir. Níor chaith sé ach an dá bhliain sa phost ach shiúil sé cuid mhaith den chontae. Deir Ó Catháin: ‘Suas le 10,000 leathanach lámhscríbhinne a tháinig óna pheann agus ní bréag ar bith a rá gur éirigh le Liam Mac Meanman sciar mór den dúchas s’aige féin, an dúchas Conallach, a shábháil agus é sin uilig in achar gearr chúpla bliain.’ Chaith sé an chuid eile dá shaol oibre ag múineadh i bhFánaid, i nGleann Daoile, i nDroim Eochaille agus ar deireadh san Fhál Carrach. Bhí sé ar bhunaitheoirí Chumann Staire Dhún na nGall agus scríobhadh ailt in Donegal Annual. Scríobh sé stair Ghleann Fhinne. D’éag sé 1 Iúil 1991 agus tá sé curtha i nGleann Fhinne. Bhí sé pósta ar Kitty Carr agus bhí mac agus iníon acu.

Diarmuid Breathnach

Máire Ní Mhurchú