‘Pilib Ministir’ a thugtaí air nó ‘Parson Brady’. Tá péire dán leis, ‘An Marcach’ agus ‘An Dearnaid’, mar aon le heolas faoi, i gcló in Nua-Dhuanaire II, 1976. Tá cuntais air ag J.B. Leslie in Biographical succession lists of Kilmore (NLI MS 2685), ag Éadbhard Ó Raghallaigh in A Chronological account of nearly Four Hundred Irish Writers..., 1820 agus ag Donal O’Sullivan in Carolan: The Life and Times of an Irish Harper, 1958. In Achadh Uí Mhaoláin, Co. an Chabháin, a rugadh é. Sagart Caitliceach é, deirtear, a chuaigh isteach in Eaglais na hÉireann. Is mar seo a chuir Seán Ó Donnabháin síos air i litir a sheol sé ón gCabhán ar 28 Bealtaine 1836; ‘This Philip McBrady, the Dean Swift of Cavan, was a native of the Parish of Drung and a Parish Priest until he embraced the aristocratic religion of the State, for which he handed down his name to posterity as Philip Ministir,’ Deir D. J. O’Sullivan: ‘He became a Protestant... but he seems to have regretted the change, and if his practice was Protestant his precept was Catholic – at any rate according to this biographer [tagairt do RIA. MS 23N33]’. Ceapadh ina reachtaire ar pharóiste Chill Dalláin i ndeoise na Cille Móire é i 1691. Bhí sé ina bhiocáire ar pharóiste Inis Mac Rá, 1704–1719. Bhí sé pósta ar Mary Brodrick ón gCabhán; i 1682 a tugadh ceadúnas pósta dó agus is ag an bpointe sin a d’iompaigh sé. I 1711 d’fhoilsigh John RichardsonSeanmora ar na Priom Phoncibh na Chreideamh, arb é atá ann cúig sheanmóir. Pilib a d’aistrigh ceann díobh, seanmóir a thug John Tillotson os comhair an rí agus na banríona sa bhliain 1689, Deir Nicholas Williams (I bPrionta i Leabhar... 1567–1724, 1986) nach bhféachann Mac Brádaigh le hathchruth a chur ar Bhéarla casta Tillotson agus nach féidir dea-aistritheoir a thabhairt air: ‘Ní dhéanann sé ach an buntéacs Béarla a aistriú focal ar fhocal nach mór, rud a fhágann go bhfuil a chuid Gaeilge dothuigthe go minic.’ Is dóigh gur chuidigh sé le Richardson chun Leabhar na nUrnaithe gComhchoiteann a ullmhú. Is é a bhí le rá ag Ó Raghallaigh faoi: ‘He was a man of great wit, a good scholar, and particularly well-versed in the language of his country. Many of his epigrams and witty sayings, and some short poems of his composition are recited by the common people in the counties of Meath and Cavan...’. Tá dán a chum sé do Thoirdhealbhach Ó Cearbhalláin i gcló in Louth Archaeological Society Journal Vol 2, No. 1. Luaití é mar údar ‘Comhairle Mhic Clamha’ ach tá Seosamh Ó Dufaigh (Comhairle Mhic Clamha ó Achadh na Muileann, 1966) deimhneach de gurbh é Eoghan Ó Donnghaile a scríobh. Chreidtí uair gur dheartháir é le Fiachra Mac Brádaigh ach, cibé gaol a bhí acu le chéile, is léir nár den ghlún chéanna iad.

Diarmuid Breathnach

Máire Ní Mhurchú